Во текот на изминатото деноноќие, на територијата на Пелагонискиот регион на повеќе локации избувнаа пожари. За нивно навремено локализирање и гаснење потребна е брза и ефикасна противпожарна интервенција.
Со цел заштита на јавниот интерес, безбедноста на граѓаните и овозможување непречено дејствување на противпожарните служби, директорот на ЈП "Стрежево" – Битола донесе Одлука со која се дозволува на Дирекцијата за заштита и спасување користење на водата од Акумулацијата „Стрежево“ за потребите на воздухопловно гаснење на отворени и шумски пожари.
Поради наведеното, се апелира до сите корисници на пловни средства во рекреативната зона да не ги користат чамците и другите пловни средства до понатамошно известување, со цел да се обезбеди непречено и безбедно користење на акумулацијата од страна на воздухопловите ангажирани во гаснењето на пожарите.
Мерката е превентивна и се презема во интерес на општата безбедност и заштитата на животот, имотот и природата.